ગુજરાતી પત્રકારત્વમાં પ્રશાંત દયાળનું નામ જાણીતું છે. તેઓએ ત્રણેક દાયકાથી ગુજરાતી પત્રકારત્વને પોતાના રિપોર્ટિંગથી ધબકતું રાખ્યું છે, હજુ પણ રાખે છે. હાલમાં તેઓની રોજબરોજની સ્ટોરીઝ જોવાનું ઠેકાણું ‘નવજીવન ન્યૂઝ' ન્યૂઝ પોર્ટલ છે. આ સાથે તેઓ નવજીવન ટ્રસ્ટ સાથે સંકળાયેલાં છે અને સાબરમતી જેલના બંદીવાનો અર્થે વિવિધ કાર્યક્રમો કરી રહ્યા છે, તેમાંનો એક અદ્વિતિય લાગતો કાર્યક્રમ બંદીવાનોને પત્રકારત્વનો અભ્યાસ કરાવવાનો છે, જેની અત્યાર સુધી પાંચ બેચ થઈ છે અને તેમાં 150 જેટલાં બંદીવાનોએ પત્રકારત્વનો અભ્યાસ કર્યો છે.

પ્રશાંતભાઈ ઘટનાઓના માણસ છે. ગુનાખોરીની દુનિયામાં તેઓએ કરેલું રિપોર્ટિંગ સિમ્હાચિન્હરૂપ છે. ગુજરાતના ફેક એન્કાઉન્ટર હોય કે સાબરમતી જેલની સુરંગ કાંડ કે હાલની ડિપીએસ સ્કૂલનું રિપોર્ટિંગ તેઓ સત્યને સામે લાવવા સતત મથતાં રહ્યાં છે અને તે માટે જાતને જોખમમાં મૂકતા રહ્યા છે. આવી ઘટનાઓમાંથી જ પ્રેરણાદાયી કહી શકાય તેવી ‘જીવતી વારતા' નામે એક સિરીઝ ગુજરાતી વાચકોને મળી, જે સિરીઝનો વાચક વર્ગ આજે પણ તે જીવાતી વારતાઓને યાદ કરે છે. આવી તો અનેક ઘટનાઓ છે, જેનાથી પ્રશાંત દયાળ નામનું એક વ્યક્તિત્વ ઉભરે છે. તેઓને વધુ નજીકથી જાણવા હોવ તો તેમણે લખેલી ‘હું પ્રશાંત દયાળ’ વાંચવી રહી.